ஜம்மு-காஷ்மீரில், ராணுவ வீரர்கள் சென்ற வாகனங்கள் மீது பயங்கரவாதிகள் நடத்திய தாக்குதலில் மூன்று ராணுவ வீரர்கள் வீரமரணம் அடைந்துள்ளனர்.
ஜம்மு-காஷ்மீர் மாநிலம் ரஜோரி, பூஞ்ச் மாவட்ட எல்லைப்பகுதியில் பயங்கரவாதிகள் சிலரின் நடமாட்டம் இருப்பதாக தகவல் கிடைத்ததை தொடர்ந்து தேடுதல் வேட்டையில் ஈடுபடுவதற்காக ராணுவ வீரர்கள் இரண்டு வாகனங்களில் சென்று கொண்டிருந்தனர்.
அப்போது வாகனங்கள் சவுரான் கோட் என்ற பகுதி வழியாக ராஜோரி மாவட்டம் பூபியாஸ் என்ற பகுதிக்கு சென்ற போது மறைந்திருந்த பயங்கரவாதிகள் ராணுவ வாகனங்கள் மீது திடீர் தாக்குதல் நடத்தினர்.
உஷாரடைந்த ராணுவ வீரர்கள் எதிர் தாக்குதல் நடத்தினர். அப்போது படுகாயமடைந்த மூன்று வீரர்கள் வீரமரணம் அடைந்தனர். தொடர்ந்து அங்கு இரு தரப்பிலும் துப்பாக்கி சண்டை நடைபெற்று வருவதாகவும், பயங்கரவாதிகள் தேடுதல் வேட்டை தீவிரப்படுத்தப்பட்டு உள்ளதாகவும் தகவல்கள் வெளியாகியுள்ளன.
