மறைந்த நடிகரும், தேமுதிக தலைவருமான விஜயகாந்தின் உடல் தீவுத்திடலில் அஞ்சலிக்காக வைக்கப்பட்டது. அவரது உடலுக்கு மத்திய நிதி அமைச்சர் நிர்மலா சீதாராமன் மத்திய அரசு சார்பில் நேரில் அஞ்சலி செலுத்தினார். அப்போது அவருடன் தமிழக பாஜக தலைவர் அண்ணாமலை, முன்னாள் மத்திய அமைச்சர் பொன் ராதாகிருஷ்ணன், பாஜக சட்டமன்ற உறுப்பினரும் குழு தலைவருமான நயினார் நாகேந்திரன் மற்றும் முக்கிய நிர்வாகிகளும் அஞ்சலி செலுத்தினார்.
இதனை தொடர்ந்து பத்திரிகையாளர்களிடம் பாஜக தலைவர் அண்ணாமலை பேசியதாவது:
‘‘தமிழகத்தின் அற்புதமான மனிதர், ஏழைகளின் பங்காளன் கேப்டன் விஜயகாந்த். எப்படி வாழவேண்டும் என்று அனைவருக்கும் காட்டிவிட்டு அவருடைய ஆன்மா இறைவனின் நிழலில் இளைப்பாற சென்றுள்ளது. இந்த துக்கமான நேரத்தில் கேப்டன் விஜயகாந்த் இல்லை என்பதை மனம் ஏற்க மறுக்கிறது.
சாதாரண குடும்பத்தில் பிறந்து தென்னிந்திய சினிமாவில் கோலோச்சியவர் கேப்டன் விஜயகாந்த். அரசியலிலும் இரண்டு பெரும் ஆளுமைகள் உள்ள நேரத்தில் மூன்றாவதாக ஒரு ஆளுமையாக வந்த அவருக்கு மக்கள் அன்பையும் அரவணைப்பையும் கொடுப்பார்கள் என்பதையும் நமக்கெல்லாம் உணர்த்தியவர். தமிழகத்தில் புதுமையான ஒரு அரசியலை எடுக்க முயன்றவர் கேப்டன். பிரதமர் நரேந்திர மோடியின் முழு அன்பையும் பெற்றவர்.
கடந்த 2014ஆம் ஆண்டு நாடாளுமன்ற தேர்தலில் நரேந்திர மோடி வேட்பாளராக இருந்தபோது அவருக்கு முழு ஆதரவையும் கொடுத்தவர் கேப்டன் விஜயகாந்த். அப்போதைய பாஜக மாநிலத் தலைவர் பொன் ராதாகிருஷ்ணனுடன் இணைந்து தேர்தலில் மிக கடினமாக உழைத்தார். இன்று பிரதமர் நரேந்திர மோடி அவர்களின் சார்பாக மத்திய நிதி அமைச்சர் நிர்மலா சீதாராமனை அனுப்பி வைத்துள்ளார்.
நிதியமைச்சர் நிர்மலா சீதாராமன் பிரமதர் மோடி சார்பாக இரங்கல் தெரிவித்துள்ளார். கேப்டன் விஜயகாந்தின் ஆன்மா எங்கிருந்தாலும் தமிழக அரசியலை வழிநடத்தும். பிரேமலதா விஜயகாந்த் இந்த இயக்கத்தை எடுத்து வெற்றிகரமாக நடத்துவார்கள் என்ற நம்பிக்கை உள்ளது. நாங்கள் எப்போதும் அவர்களுடன் உறுதுணையாக இருப்போம். கேப்டன் ஐயாவின் புகழ் என்றும் நிலைத்திருக்கும்’’ என தமிழக பாஜக தலைவர் அண்ணாமலை உருக்கமாக கூறினார்.
