தமிழ்நாட்டில் குடியுரிமை திருத்தச் சட்டத்தை (சிஏஏ) அமல்படுத்த அனுமதிக்கவே மாட்டோம் என்று முதல்வர் ஸ்டாலின் கூறியிருந்த நிலையில், அவருக்கு காட்டமாக பதிலடி கொடுத்திருக்கிறார் பாஜக மாநிலத் துணைத் தலைவர் நாராயணன் திருப்பதி.
பாகிஸ்தான், வங்கதேசம், ஆப்கானிஸ்தான் ஆகிய நாடுகளில் துன்புறுத்தலுக்கு உள்ளாகி இந்தியாவுக்கு அகதிகளாக வந்த ஹிந்துக்கள், சீக்கியர்கள், பௌத்தர்கள், ஜைனர்கள், பார்சிக்கள், கிறிஸ்துவர்கள் ஆகியோருக்கு குடியுரிமை வழங்கும் சட்டம்தான் சிஏஏ.
இந்த சட்டத்தை மத்திய பாஜக அரசு கடந்த கொண்டு வந்தது. திமுக, காங்கிரஸ் உள்ளிட்ட கட்சிகள் இஸ்லாமியர்களின் வாக்கு அரசியலுக்காக சிஏஏ சட்டத்தை தவறாக திரித்து கூறினர்.
இந்த சூழலில், தமிழகத்தில் திமுக ஆட்சி நடைபெறும் நிலையில், சிஏஏ சட்டத்தை நடைமுறைப்படுத்த அனுமதிக்க மாட்டோம் என்றும், தமிழகத்திற்குள் சிஏஏ-வை கால்வைக்க விட மாடடோம் எனவும் ஸ்டாலின் எக்ஸ் தளத்தில் பதிவிட்டிருந்தார்.
இந்த நிலையில், முதல்வர் ஸ்டாலினின் இந்த அறிவிப்புக்கு பதிலடி கொடுக்கும் விதமாக பா.ஜ.க., மாநிலத் துணைத் தலைவர் நாராயணன் திருப்பதி தனது எக்ஸ் வலைத்தளத்தில் ஒரு பதிவை வெளியிட்டுள்ளார்.
அதில் அவர் கூறியிருப்பதாவது:
தமிழக முதல்வர் ஸ்டாலின் இது போன்று சொல்வதே சட்ட விரோதம். தமிழகத்தில் யாரும் சிஏஏ சட்டதிருத்தத்தின் கீழ் குடியுரிமை கேட்டு விண்ணப்பித்திருக்க மாட்டார்கள் என்று கருதுகிறேன். அப்படியே யாராவது விண்ணப்பித்தாலும், அவர்கள் மத்திய அரசை தான் அணுக வேண்டுமே ஒழிய, மாநில அரசுக்கு இதில் எந்த பணியும், தொடர்பும் இல்லை.
அதாவது பாகிஸ்தான், ஆப்கானிஸ்தான் மற்றும் வங்கதேச நாடுகளில் மத ரீதியாக துன்புறுத்தப்பட்ட இந்துக்கள், சீக்கியர்கள், பௌத்தர்கள், ஜைனர்கள், பார்சிக்கள், கிறிஸ்துவர்கள், டிசம்பர் 2014க்கு முன்பு இந்தியாவிற்கு வந்திருந்து, இந்திய குடியுரிமைக்கு விண்ணப்பித்திருந்தால் அவர்களுக்கு குடியுரிமை வழங்கப்படும் என்பதே இந்த சட்டத் திருத்தம்.
ஆகவே, இந்த சட்டத்தை அமல்படுத்துவதற்கோ, நடைமுறைப்படுத்துவதற்கோ மாநில அரசுக்கு எந்த பங்கும் இல்லாத நிலையில், முதல்வரின் இந்த அறிக்கை வெறும் அரசியல் பேச்சு மட்டும் தான். இந்த சட்டமானது இந்திய குடிமக்களுக்கானதே இல்லை என்பதை முதல்வர் அறிவாரா? இந்த சட்டத்தை விமர்சிக்கலாம் அல்லது எதிர்க்கலாம். ஆனால் நடைமுறைப்படுத்த மாட்டோம் என சொல்வதும், சிஏஏ கால் அல்லது கை பதிக்க விட மாட்டோம் என கூறுவதும் வெறும் வெற்று பேச்சே. குடியுரிமை வழங்குவது என்பது முழுக்க முழுக்க மத்திய அரசின் உரிமை என்பதை இங்கு நினைவுப்படுத்துகிறேன் என நாராயணன் திருப்பதி கூறியுள்ளார்.
