‘‘கிராமங்களில் உள்ள சிறு விவசாயிகளையும் , நவீன தொழில்நுட்பத்துடன் இணைக்க நடவடிக்கை எடுக்கப்பட்டு வருகிறது’’ என குஜராத் மாநிலம், ஆமதாபாத்தில் நேற்று (பிப்ரவரி 22) நடந்த நிகழ்ச்சியில் பிரதமர் நரேந்திர மோடி பேசினார்.
குஜராத்தில் நடந்த கூட்டுறவு பால் விற்பனை கூட்டமைப்பின் பொன்விழா கொண்டாட்டத்தில், பல்வேறு பகுதிகளைச் சேர்ந்த ஏராளமான விவசாயிகள் பங்கேற்றனர். இந்த நிகழ்ச்சியில் பிரதமர் நரேந்திர மோடி பங்கேற்று பேசியதாவது:
இன்று அமுல் நிறுவனம் ,கால்நடை வளர்ப்பின் அடையாளமாக மாறிவிட்டது. விவசாயிகளுக்கு அதிகாரமளிக்கும் வகையில், பா.ஜ.க., அரசு செயல்பட்டு வருகிறது.
சுதந்திரம் அடைந்த பிறகு, நாட்டில் பல்வேறு பால் நிறுவனங்கள் துவங்கப்பட்டன. ஆனால் அமுல் நிறுவனம் போல் யாரும் கால்நடைப் பராமரிப்பாளர்களின் அடையாளமாக மாறவில்லை. விவசாயிகளுக்கு உதவி செய்வதே எங்கள் நோக்கம். காங்கிரஸ் ஆட்சியில் விவசாயிகளின் நலனுக்காக எந்த திட்டமும் உருவாக்கப்படவில்லை. 50 ஆண்டுகளுக்கு முன் குஜராத்தின் கிராமங்களில் நடப்பட்ட மரக்கன்று, இன்று பெரிய ஆலமரமாக மாறியுள்ளது. இந்த மரத்தின் கிளைகள், தற்போது நாடு முழுவதும் விரிவடைந்துள்ளன.
நாட்டை 5வது பெரிய பொருளாதாரமாக ,மாற்ற பால்பண்ணைத் தொழில் பெரும் பங்கு வகித்துள்ளது. இந்தியாவை வளர்ந்த நாடாக மாற்ற, ஒவ்வொரு பெண்ணின் நிதி நிலைமையை, வலுவாக மாற்றுவது முக்கியம். அதனால்தான் பெண்களை பொருளாதார ரீதியாக வலுவூட்டும் பணியை பா.ஜ.க., செய்து வருகிறது.
முத்ரா யோஜனா திட்டத்தின் கீழ், 70 சதவீத பெண்களுக்கு 30 லட்சம் கோடி ரூபாய் கடன் வழங்கப்பட்டுள்ளது. கிராமங்களில் உள்ள சிறு விவசாயிகளை நவீன தொழில்நுட்பத்துடன் இணைக்க நடவடிக்கை எடுக்கப்பட்டு வருகிறது. இவ்வாறு பிரதமர் மோடி பேசினார்.
