மத்திய அரசு திட்டங்களின் பயனாளிகள் அனைவரையும் கண்டறிந்து, ‘நமோ’ செயலியில் பதிவேற்றம் செய்வதில் தமிழகம் மூன்றாவது இடம் பிடித்ததற்காக மகளிரணியினக்கு, தமிழக பாஜக தலைவர் அண்ணாமலை பாராட்டுக்களை தெரிவித்துள்ளார்.
நாடு முழுவதும் மத்திய அரசு செய்து வரும் நலத்திட்டங்களில் பல கோடி ஏழை, எளிய மக்கள் பயனடைந்து வருகின்றனர். அது போன்றவர்களை கண்டறிந்து அவர்களுடன் புகைப்படம் எடுத்து நமோ செயலி மூலமாக பதிவேற்றம் செய்யப்பட்டு வருகிறது.
அதே போன்று மத்திய அரசின் திட்டத்தில் தமிழகத்தில் லட்சக்கணக்கான மக்கள் பயனடைந்து வருகின்றனர். பிரதமர் வீடு கட்டும் திட்டம், சாலை வியாபாரிகளுக்கு லோன், விவசாயிகளுக்கு தேவையான இடுபொருட்கள் மற்றும் மானியத்தில் உரம் உள்ளிட்டகைள் என சொல்லிக்கொண்டே போகலாம்.
இந்த நிலையில், தமிழகத்தில் மத்திய அரசின் திட்டத்தின் வாயிலாக பயனடைந்த பயனாளிகளை கண்டறிந்து அவர்களுடன் புகைப்படம் எடுத்து, அதனை நமோ செயலியில் பதிவேற்றம் செய்வதை தமிழக பாஜக மகளிர் அணியினர் திறம்பட செய்து வருகின்றனர் என்பது குறிப்பிடத்தக்கது.
இந்த நிலையில், தமிழக பாஜக தலைவர் அண்ணாமலை வெளியிட்டுள்ள அறிக்கையில்; நாடு முழுவதும் மாநிலங்களிடையே, மாண்புமிகு பாரதப் பிரதமர் திரு.நரேந்திர மோடி அவர்கள் தலைமையிலான மத்திய அரசு நலத்திட்டங்களின் பயனாளிகளைக் கண்டறிந்து, அவர்கள் புகைப்படங்களை நமோ செயலியில் பதிவேற்றம் செய்யும் நிகழ்வில், தமிழகம் இந்திய அளவில், மூன்றாவது இடம் பிடித்துள்ளது.
தமிழகத்தில், 5000 பயனாளிகளுக்கு மேல், புகைப்படங்களை நமோ செயலியில் பதிவேற்றம் செய்த பாஜக மகளிரணியினரைச் சந்தித்து வாழ்த்துக்களும் பாராட்டுக்களும் தெரிவித்துக் கொண்டேன். தமிழக அளவில், ஐந்தாயிரம் பயனாளிகளுக்கு மேல் கண்டறிந்து, அவர்கள் புகைப்படங்களைப் பதிவேற்றம் செய்த பாஜக சகோதர சகோதரிகள் 13 பேரில், 11 பேர், கோவை பெருங்கோட்ட மகளிரணியினர் என்பது குறிப்பிடத்தக்கது. அவர்களை இன்று சந்தித்ததில் பெருமகிழ்ச்சி.
இந்த நிகழ்வினை அகில இந்திய அளவில் சிறப்பாக ஒருங்கிணைத்து நடத்தி வரும், மகளிர் அணியின் தேசியத் தலைவி திருமதி வானதி சீனிவாசன் அக்கா அவர்களுக்கு எங்கள் வாழ்த்துக்களைத் தெரிவித்துக் கொள்கிறோம். தமிழகத்திலிருந்து பெருவாரியான வெற்றியாளர்களைப் பெற்றுத்தந்த கோவை பெருங்கோட்டப் பொறுப்பாளர் திரு. ஏ.பி.முருகானந்தம் அவர்களுக்கு நன்றிகளைத் தெரிவித்துக் கொள்கிறேன். இவ்வாறு அவர் குறிப்பிட்டுள்ளார்.
-வ.தங்கவேல்
