தமிழகத்தில் நாடாளுமன்றத் தேர்தல் ஏற்பாடுகள் குறித்து, சென்னையில் தலைமை தேர்தல் ஆணையர் ராஜிவ்குமார் ஆலோசனை நடத்தினார். அதில், ஐ.ஏ.எஸ்., ஐ.பி.எஸ்., அதிகாரிகள் பங்கேற்றனர்.
விரைவில் நாடாளுமன்றத் தேர்தல் நடைபெற உள்ள நிலையில், அதற்கான ஏற்பாடுகளை தேர்தல் ஆணையம் செய்து வருகிறது. தமிழகம் வந்துள்ள தலைமை தேர்தல் ஆணையர் ராஜிவ் குமார், சென்னையில் உள்ள மாநில தேர்தல் ஆணையத்தில், அங்கீகரிக்கப்பட்ட தேசிய, மாநில கட்சிகளின் பிரதிநிதிகளுடன் ஆலோசனை நடத்தினார். துணை ஆணையர் தர்மேந்திர சர்மா, நிதேஷ் நியாஸ், அஜய் ஆகியோரும் உடன் உள்ளனர். இக்கூட்டத்தில் பாரதிய ஜனதா கட்சி, ஆம் ஆத்மி, பகுஜன் சமாஜ், திமுக, அதிமுக உள்ளிட்ட கட்சிகளின் பிரதிநிதிகள் பங்கேற்று, தங்களின் கருத்துகளை தெரிவித்தன.
இதனைத் தொடர்ந்து மாவட்ட ஆட்சியர்கள், போலீஸ் உயர் அதிகாரிகளுடன் ராஜிவ் குமார் ஆலோசனை நடத்தினார். பல மாவட்ட ஆட்சியர்கள் மற்றும் எஸ்.பி.,க்கள் கூட்டத்தில் பங்கேற்ற நிலையில், மேலும் பல அதிகாரிகள் வீடியோ கான்பரன்சிங் வாயிலாகவும் பங்கேற்றனர்.
