ஓட்டுப்பிச்சை எடுப்பவர்களை வீட்டுக்கு அனுப்புங்கள் : கோவை ‘கருப்பு தின பேரணி’யில் தலைவர் அண்ணாமலை கர்ஜனை

ஓட்டுப்பிச்சை எடுப்பவர்களை வீட்டுக்கு அனுப்புங்கள் என்று கோவையில் நடந்த கருப்பு தின பேரணியில் பங்கேற்ற தலைவர் அண்ணாமலை கர்ஜித்தார்.

கோவை குண்டுவெடிப்பு பயங்கரவாதிகளுக்கு துணைபோகும் திமுக அரசை கண்டித்து, பா.ஜ.க., சார்பில் கோவையில் (டிசம்பர் 20) ‘கருப்பு தின பேரணி’ நடத்தப்பட்டது. இந்த பேரணியில் தலைவர் அண்ணாமலை பங்கேற்றார். இந்நிகழ்ச்சியில் தலைவர் அண்ணாமலை பேசியதாவது:

2022 அக்டோபர் 23ல் கோட்டை சங்கமேஸ்வரர் கோவில் முன், ஒரு தீவிரவாதி மனித வெடிகுண்டாக மாறி, காரில் வருகிறான். கோவை மாநகரத்துக்குள் அதிகமான மக்கள் செல்லக்கூடிய துணிக்கடைக்குள் அந்த காரை நிறுத்த வேண்டும்; அந்த கார் வெடிக்கும்போது, தூண்கள் சரிந்து, கடை இடிந்து விழ வேண்டும் என்ற நோக்கத்துடன் வரும்போது கோவில் அருகே வேகத்தடையை கடந்தபோது, காஸ் சிலிண்டர் சர்க்யூட் இணைப்பு ‘கட்’ ஆகி விட்டது; வண்டி அவ்விடத்திலேயே நிற்கிறது.

அப்போது, குண்டு வெடித்து அதே இடத்திலேயே தீவிரவாதி இறந்து விடுகிறான். இது, மனித வெடிகுண்டு தாக்குதல் என கூறினோம். இதை சிலிண்டர் வெடிப்பு என முதல்வர் ஸ்டாலின் கூறினார். மக்களுடைய உயிருக்கு பாதுகாப்பு இல்லாத நிலை ஏற்படும்போது, ஒரு முதல்வர் எப்படி பேசினார்; சட்டம் – ஒழுங்கு எப்படி இருக்கிறது என்பதற்கு இது உதாரணம்.

2022ம் ஆண்டு பிப்ரவரி 7ம் தேதி, சத்தியமங்கலம் வனப்பகுதியில் உமர்பாருக் என்பவன் தலைமையில் எட்டு பேர் இணைகின்றனர். அதில் கார் குண்டுவெடிப்பில் பலியான முபினும் ஒருவன். அவர்கள் சத்யப்பிரமாணம் செய்கின்றனர்.

ஒவ்வொருவரும் என்ன வேலை செய்ய வேண்டுமென உமர்பாருக் கூறுகிறான். பிப்ரவரி 7ல் சத்தியமங்கலம் காட்டில் திட்டமிடுகின்றனர். ‘இத்தீவிரவாதத்தை தற்கொலை தாக்குதலாக நடத்த வேண்டியது, உன் பொறுப்பு’ என, முபினிடம் உமர்பாருக் தெரிவிக்கிறான்.

மார்ச் மாதத்தில் 750 கிலோ அமோனியம் நைட்ரேட் வாங்குகிறான். அதனுடன் சல்பர் கலந்தால் வெடிபொருள். காரில் சிலிண்டருடன் வந்த முபினுடைய 2வது இலக்கு, காவல் ஆணையர் அலுவலகமாக இருந்தது. 7 பேர் 7 இடங்களில் தாக்குதல் நடத்த வேண்டுமென எழுதி வைத்திருக்கின்றனர்.

முதல் இடம் துணிக்கடை; இரண்டாவது இடம் காவல் ஆணையர் அலுவலகம். ஆனால், காவல்துறை தரப்பில், அது சிலிண்டர் வெடிப்பு என கூறப்பட்டது. முதலில், காவல் சீருடை அணிந்து பணிபுரிந்து வருகிறீர்களே, நீங்கள் பஸ்பமாகி இருப்பீர்கள்.

முபின் ஏழு நிமிட வீடியோ பதிவு செய்திருக்கிறான்; எப்படி கழுத்தை அறுப்பது; எப்படி கொலை செய்ய வேண்டும் என, வீடியோ பதிவிட்டிருக்கிறான். நான் சொல்வது உண்மையா என்பதை, ‘சார்ஜ் சீட்’டை படித்துப் பாருங்கள்.

இந்த சம்பவம் தொடர்பாக தேசிய புலனாய்வு ஆணையம் இதுவரை 18 பேரை கைது செய்திருக்கிறது. அதனால் கோவையில் என்.ஐ.ஏ., அமைக்க, மத்திய அரசு பரிசீலனை செய்கிறது.

1998 பிப்ரவரி 14ல் நடந்த கோவை குண்டுவெடிப்பு சம்பவத்துக்கு, மைசூருவில் இருந்து வெடிமருந்து வாங்கி வந்தவர் பாஷா. அதில், 50க்கும் மேற்பட்டோர் உயிரிழந்தனர். 250க்கும் மேற்பட்டோர் படுகாயம் அடைந்தனர்.

இதே பாஷா, 2003ல் நீதிமன்றத்துக்கு அழைத்துச் சென்றபோது செய்தியாளர்களை பார்த்து, கோவைக்கு மோடி வந்தால், கொன்று விடுவேன் என்று கத்தினார். அப்போது குஜராத் முதல்வராக மோடி இருந்தபோது கோவைக்கு வந்தார். பின்னர் பிரதமர் ஆனார்; கோவைக்கு வந்து, ‘ரோடு ஷோ’ நடத்தி காட்டினார்.
குண்டுவெடிப்பால் உயிரிழந்த 58 பேருக்கு, ரோடு ஷோ நடத்தியபோது பிரதமர் நரேந்திர மோடி அஞ்சலி செலுத்தினார். இறந்துபோன இஸ்லாமியர்களுக்கும் அஞ்சலி செலுத்தினார். நாங்கள் இந்தியர்கள் என்பதே எங்கள் அடையாளம்.

நானும் ஒரு கிறிஸ்தவன்; நானும் ஒரு இஸ்லாமியன் என, உதயநிதி சொல்கிறார். நானும் ஒரு ஹிந்து என சொல்லலாமே. இஸ்லாமியர்களும், கிறிஸ்தவர்களும் நன்றாக இருக்க வேண்டுமெனில் ஓட்டுப்பிச்சை எடுப்பவர்களை வீட்டுக்கு அனுப்புங்கள்.

1993ல் ஆர்.எஸ்.எஸ்., அலுவலகத்தை தகர்த்தபோது, அல்-உம்மா இயக்கத்தினரை கைது செய்தனர். 1997 ஜனவரி மாதம் முக்கிய குற்றவாளிகள், பெயிலில் வெளியே வருகின்றனர். நீதிமன்றத்தில் ஆஜராக வேண்டிய அரசு வக்கீல் ஆஜராகவில்லை.

அப்போது தி.மு.க., ஆட்சி நடந்தது. அதே அல்-உம்மா இயக்கத்தினர், 1998ல் கோவையில் வெடிகுண்டு சம்பவத்தை நிகழ்த்தினர். 2009ல் அண்ணாதுரை நூற்றாண்டு விழாவில் ஒன்பது பேரை விடுதலை செய்தனர்.

ஈரோடு கிழக்கு இடைத்தேர்தலின் போது வெடிகுண்டு சம்பவத்தில் கைதாகி சிறையில் இருப்பவர்களை, அரசு விடுதலை செய்யும் என மாஜி அமைச்சர் மஸ்தான் பேசினார். ஆளுநரை சந்தித்து மனு கொடுத்து நிறுத்தி வைத்தோம். தமிழர்களின் மிகப்பெரிய வியாதி மறதி; இவ் வியாதி இருக்கும் வரை ஓட்டுப்பிச்சை எடுக்கும் அரசியல், இருந்து கொண்டே இருக்கும். இவ்வாறு தலைவர் அண்ணாமலை பேசினார்.

இந்த பேரணியில் இந்து முன்னணி மாநிலத் தலைவர் காடேஸ்வரா சுப்பிரமணியம், விஷ்வ ஹிந்து பரிஷத் மாவட்டத் தலைவர் சிவலிங்கம். பாஜக தேசிய மகளிர் அணி தலைவரும், கோவை தெற்கு தொகுதி சட்டமன்ற உறுப்பினருமான வானதி சீனிவாசன், கோவை மாநகர் மாவட்டத் தலைவர் ரமேஷ் மற்றும் பெருவாரியான பொதுமக்களும், பாஜக சகோதர சகோதரிகளும் கலந்து கொண்டனர்.

பேரணியில் பங்கேற்றதற்காக தலைவர் அண்ணாமலை, இந்து முன்னணி மாநிலத் தலைவர் காடேஸ்வரா சி.சுப்பிரமணியம், பாஜக சகோதர சகோதரிகள், பொதுமக்கள் உள்ளிட்ட அனைவரையும் கைது செய்தது கையாலாகாத திமுக அரசின் காவல்துறை. இந்த கைதுக்கு பொதுமக்கள் உட்பட பலரும் கண்டனம் தெரிவித்தனர்.