மோடியை மூன்றாவது முறையாக பிரதமராக்க நாடு முடிவு செய்துவிட்டது என மத்திய உள்துறை அமைச்சர் அமித்ஷா தெரிவித்துள்ளார்.
பீகார் மாநிலம் மதுபானி மக்களவை தொகுதியில் நேற்று (மே 16) நடந்த தேர்தல் பிரசார கூட்டத்தில் மத்திய உள்துறை அமைச்சர் அமித்ஷா பங்கேற்று பேசினார். அவர் பேசியதாவது:
இண்டி கூட்டணியில் பிரதமர் பதவிக்கு ஆள் இல்லை. மோடியை மூன்றாவது முறையாக பிரதமராக்க நாடு முடிவு செய்துள்ளது. ஆனால், இண்டி கூட்டணியில் யார் பிரதமர் வேட்பாளர் என்று சொல்ல முடியுமா?
அவர்கள் எப்படியும் ஆட்சியை பிடிக்க போவதில்லை. இருந்தாலும் ஒரு பேச்சுக்கு கேட்கிறேன். மம்தா பானர்ஜி பிரதமர் ஆவாரா? மு.க.ஸ்டாலின் பிரதமர் ஆவாரா? லாலுபிரசாத் பிரதமர் ஆவாரா? அவர்கள் பிரதமர் பதவியை ஆண்டுக்கு ஒருவர் வீதம் தங்களுக்குள் சுழற்சி முறையில் பகிர்ந்து கொள்ள முடிவு செய்துள்ளனர். மீண்டும் கொரோனா போன்ற சூழ்நிலை வந்தால், அவர்களால் நாட்டை காப்பாற்ற முடியுமா? பயங்கரவாதிகளிடம் இருந்து நாட்டை பாதுகாக்க முடியுமா? இந்தியாவுக்கு வலிமையான பிரதமர் தேவை. ஆண்டுக்கு ஒரு பிரதமர் தேவையில்லை.
இவ்வாறு அவர் பேசினார்.
