திமுக ஃபைல்ஸ் பாகம் மூன்றின் 5-வது ஆடியோவில் 2ஜி ஊழல் வழக்கு குறித்து திமுக எம்.பி., ராசா – அன்றைய உளவுத்துறைத் தலைவர் ஜாபர் சேட் இடையிலான உரையாடல் குறித்த ஆடியோவை தலைவர் கே.அண்ணாமலை வெளியிட்டார்.
திமுக ஃபைல்ஸ் பாகம் மூன்றின் 5-வது ஆடியோவில் 2ஜி வழக்கு குறித்து ராசா, முன்னாள் உளவுத்துறை அதிகாரி ஜாபர் சேட் இடையிலான உரையாடல் குறித்த ஆடியோவை தலைவர் கே.அண்ணாமலை தனது எக்ஸ் பக்கத்தில் வெளியிட்டுள்ளார். அதில் சி.பி.ஐ., சோதனை செய்ய உள்ள தகவல் தொடர்பாக இருவரும் பேசியுள்ளனர்.
தலைவர் கே.அண்ணாமலை 2023ல் தி.மு.க., ஃபைல்ஸ் பாகம் ஒன்று மற்றும், தி.மு.க., ஃபைல்ஸ் பாகம் இரண்டை வெளியிட்டார். அதில் முதல்வர் ஸ்டாலின், அவரது குடும்பத்தினர், அமைச்சர்களின் சொத்துப் பட்டியலை வெளியிட்டு, பல்வேறு குற்றச்சாட்டுக்களை தெரிவித்தார். இந்தாண்டு ஜனவரியில், அண்ணாமலை, தி.மு.க., ஃபைல்ஸ் மூன்றை வெளியிட்டார்.
அதில், ‘2ஜி’ அலைக்கற்றை ஊழல் வழக்கு தொடர்பாக, தி.மு.க., எம்.பி., – டி.ஆர்.பாலு மற்றும் ஜாபர்சேட் உரையாடல் இடம் பெற்ற ஆடியோ பதிவு இருந்தது.
அதைத்தொடர்ந்து தி.மு.க., எம்.பி., ராசா மற்றும் அன்றைய உளவுத்துறைத் தலைவா் ஜாபர்சேட் பேசும் ஐந்தாவது ஆடியோ பதிவை அண்ணாமலை நேற்று இரவு (மார்ச் 07) வெளியிட்டார்.
அதில் இடம்பெற்றுள்ள உரையாடல் விபரம்:
ராசா: சார், நாளைக்கு ஒரு சின்ன ஒரு சோதனை ஓட்டம் இருக்கு போல…
ஜாபர்சேட்: என்ன சார்?
ராசா: சோதனை ஓட்டம் தமிழகம் முழுதும் இருக்கு
ஜாபர்சேட்: நாளைக்கா, எங்கெங்கே?
ராசா: எல்லா இடத்திலும், எனக்கு வேண்டிய இடத்தில் எல்லாம்
ஜாபர்சேட்: உங்களுக்கு வேண்டிய இடத்தில் எல்லாமா?
ராசா ஆமாம்… நான் இன்னும் தகவலை பரிமாறவில்லை. எப்படி தகவல் சொல்லணும் என்று தெரியவில்லை; அந்த,’ புரொசீஜரை குளோஸ்’ செய்வதற்கு ஒரு சோதனை ஓட்டம் இருக்கும் போல; நம்ம ஆளு போனை, ‘ஆப்’ செய்து வைத்திருக்கிறார். அவருக்கு தகவல் சொல்லலாமா?
ஜாபர்சேட்: யார் மூலமா?
ராசா: வேற நம்பர் இருக்கா என்ன?
ஜாபர்சேட்: யாருக்கு?
ராசா: நம்ம பிரண்டுக்கு, நம்ம பிரண்டுக்கு
ஜாபர்சேட்: யார், என் பிரண்டுக்கா?
ராசா: இல்ல இல்ல நம்ம பிரண்டுக்கு, பெரம்பலுாருக்கு
ஜாபர்சேட்: என்னிடம் வேறு நம்பர் இல்லையே சார்!
ராசா: அவர் நம்பர் கிடைக்க மாட்டேங்குது…
ஜாபர்சேட்: சரி, அப்படீன்னா?
ராசா: எல்லாரையும் அலர்ட் செய்யலாம்னு பார்த்தேன்
ஜாபர்சேட்: வேற வழியில் தகவல் சொல்றேன்
ராசா: ஏற்கனவே நான் சொல்லிட்டேன். எல்லாருக்கும் போன வாரமே சொல்லிட்டேன்; பேக் வச்சுட்டு ரெடியாக இருங்கனு
ஜாபர்சேட்: இப்ப நேரம் இல்ல, காலைல, 6:00 மணிக்கு
ராசா: தவறான உள்நோக்கம் இல்லை, நீதிமன்றத்திற்கு முன்னாடி நான் எல்லார் வீட்டிற்கும் போகலாம் என்று சொல்லனும்
ஜாபர்சேட்: ஆமாம், காலையில், 6:30 மணிக்கு முடிச்சுடலாம்
ராசா: 10, 12 இடங்களில் தொடர்ந்து ஒரே சமயத்தில் செய்வார்கள் போல,
ஜாபர்சேட்: சரிங்க சார்
ராசா: சரி பார்ப்போம், முடிஞ்சா தகவல் சொல்ல, எனக்கு அவரு கிடைக்கவில்லை. அவரு இரவு முழுதும் கண் விழித்து, வீட்டில் எல்லாருக்கும் தகவல் சொல்லிடுவாரு
ஜாபர்சேட்: பார்ப்போம், வேற இருக்கானு, நான் டிரை பண்றேன்
ராசா: தெரியவில்லை எனக்கு, வழக்கமான எண் கிடைக்கவில்லை.
இவ்வாறு அந்த உரைடயாடல் இடம்பெற்றுள்ளது.
